“လူတန်းစားသစ်” စာအုပ်ကို ရေးသားသူ မီလိုဗန် ဂျီးလာ့စ် (Milovan Djilas)

“လူတန်းစားသစ်” စာအုပ်ကို ရေးသားသူ မီလိုဗန် ဂျီးလာ့စ် (Milovan Djilas)

● တော်လှန်ရေးကာလများကို ဖြတ်သန်းလျက် ယူဂိုဆလပ်ကို ကွန်မြူနစ်နိုင်ငံဖြစ်လာအောင် ရဲဘော်ရဲဘက်များနှင့် လက်တွဲတည်ဆောက်ခဲ့ပြီးနောက် နိုင်ငံ၏ ဒုတိယမြောက် အာဏာအရှိဆုံး ပုဂ္ဂိုလ် ဖြစ်လာခဲ့ပြီးခါမှ – ကွန်မြူနစ်စနစ် တစ်ခုလုံး၏ အကျင့်ပျက်ခြစားခြင်း လူ့အဖွဲ့အစည်းကို ကောင်းကျိုးမပေးခြင်းတို့အား ဝေဖန်သူ ဖြစ်လာခဲ့သည့် မီလိုဗန်ဂျီးလာ့စ် သည် နိုင်ငံ၏ ဒုတိယခေါင်းဆောင်ဘ၀မှ အကျဉ်းသားဘ၀သို့ ကာလတိုအတွင်း ပြောင်းလဲရောက်ရှိသွားသည်။ နိုင်ငံရေးအကျဉ်းသား အဖြစ် ထောင်ထဲ ထွက်တုံ၀င်တုံလုပ်နေရစဉ် “လူတန်းစားသစ်” (The New Class) ဆိုသည့် စာအုပ်ကို ရေးသားပြီး အနောက်နိုင်ငံများတွင် စာအုပ်အဖြစ် ပုံနှိပ်ထုတ်ဝေသည်။ ထိုစာအုပ်မှာ စစ်အေးတိုက်ပွဲကာလအတွင်း ကျယ်ကျယ်ပြန့်ပြန့် ဖတ်ရှုခဲ့ကြသော စာအုပ်တစ်အုပ်ဖြစ်သည်။

● မွန်တီနီဂရိုးနယ်သား မီလိုဗန်ဂျီးလာ့စ် (၁၉၁၁-၁၉၉၅) သည် တက္ကသိုလ်ကျောင်းသားဘ၀တွင် ယူဂိုဆလားဗီးယား ကွန်မြူနစ်ပါတီ (KPJ) သို့ ၀င်ရောက်လျက် အာဏာရှင်ဆန်ဆန်အုပ်ချုပ်သူ ယူဂိုဆလားဗီးယားဘုရင် အလက်ဇန်းဒါးကို တော်လှန်နေကြရာတွင် ပါ၀င်ခြင်းကြောင့် အဖမ်းခံရ နှိပ်စက်ခံရကာ ထောင်သုံးနှစ်ကျသည်။ ထောင်မှ လွတ်လာသောအခါ ကွန်မြူနစ်တော်လှန်ရေးသမား လုံးလုံးလျားလျား ဖြစ်သွားပြီး တော်လှန်ရေးခေါင်းဆောင် မာရှယ်တီတိုး၏ အားကိုးအားထား လက်ရုံးတစ်ဆူ ဖြစ်လာသည်။ စပိန်ပြည်တွင်းစစ်အတွင်း ယူဂိုဆလပ် ကွန်မြူနစ် (၁၅၀၀) ခန့်ကို ဦးဆောင်ကာ စပိန် ရီပတ်ဘလီကန်များဘက်မှ ၀င်ရောက်တိုက်ခိုက်ခဲ့သေးသည်။

● ဒုတိယကမ္ဘာစစ်အတွင်း မာရှယ်တီတိုးလက်အောက် ပြောက်ကျားစစ်ခေါင်းဆောင်တစ်ဦး၊ မွန်တီးနီဂရိုး နယ်ကို လွတ်မြောက်အောင် ထကြွမှုကို ဦးဆောင်သူ၊ ပါတီအဘော် သတင်းစာ၏ အယ်ဒီတာ၊ မြို့တော် ဘဲလ်ဂရိတ် လွတ်မြောက်ရေးတွင် ပူးတွဲပါ၀င်တိုက်ခိုက်သူ စသည်အားဖြင့် အခန်းကဏ္ဍအသီးသီးတွင် ပါ၀င်ခဲ့သည်။ ဒုတိယကမ္ဘာစစ်အပြီး ၁၉၄၅-ခုနှစ်တွင် တည်ထောင်သော ယူဂိုဆလားဗီးယား ဖက်ဒရယ်ပြည်သူ့ သမ္မတနိုင်ငံ၏ ဒုတိယ သမ္မတဖြစ်လာခဲ့သည်။

အတိုက်အခံဘ၀ သို့
● ၁၉၅၃-ခုနှစ်၀န်းကျင်တွင် ပါတီခေါင်းဆောင်မှု၌ တတိယနေရာရှိ ဂျီးလတ်စ်မှာ တီတိုးကို ဆက်ခံမည့်သူအဖြစ် ကျယ်ပြန့်စွာ မှတ်ယူခြင်းခံရသူ ဖြစ်နေသည့်အပြင် ယူဂိုဆလပ်နိုင်ငံ၏ သမ္မအဖြစ် ရွေးချယ် တင်မြှောက်ခံရခါဆဲဆဲ အနေအထားကို ရောက်နေလေပြီ။ ထိုစဉ်ကာလ ၁၉၅၄ ဇွန်နဝါရီလတွင် ကွန်မြူနစ်ပါတီ၏ တရား၀င်အာဘော် သတင်းစာ Borba တွင် ဆောင်းပါးတစ်စောင်ရေးသည်။ စတာလင်ဝါဒီ အခြေပြု အလွန်အကျွံဗျူရိုကရက်စနစ်အား ပယ်ဖျက်လျက် ဗဟိုက စီမံကိန်းများချမှတ်လုပ်ဆောင်သည့် စီးပွားရေးစနစ်ကနေ တရွေ့ရွေ့ဖယ်ခွာဖို့ အယူအဆများကို စတင် တင်ပြသည်။ သူ၏အယူအဆများမှာ တစ်ပါတီချုပ်ကိုင်မှုစနစ်ကိုသာမက ကွန်မြူနစ် အထက်လွှာများအားလုံးကိုရော လက်ရှိစနစ်တစ်ရပ်လုံးကိုပါ ခြိမ်းခြောက်ရာရောက်သည်ဟု ပါတီအာဏာပိုင်များက ယူဆလာကြသောကြောင့် ပါတီရာထူးများအားလုံးမှ သူ့ကို ဖယ်ရှားလိုက်ကြသည်။ ထို့နောက် ၁၉၅၄ ဒီဇင်ဘာလတွင် The New York Times နှင့် သူနှင့် အင်တာဗျူးတွင် ယူဂိုဆလားဗီးယားအား totalitarian လုံးစည်းအာဏာရှင် စနစ်အောက် အခြေအနေအဖြစ် ဖြေကြားခဲ့သည်ကို အကြောင်းပြုလျက် ထောင်ဒဏ် (၁၈) လ ချမှတ်ခြင်းခံရသည်။ ထိုအချိန်မှစ၍ ထောင်ထဲ၀င်လိုက်၊ ထွက်လာလိုက်၊ စာတစ်ပုဒ်ရေးလိုက်၊ ထပ်မံထောင်ကျလိုက်၊ လွတ်လာလိုက်၊ နောက်တစ်ခုထပ်လုပ်လိုက်၊ ထပ်တိုးထောင်ဒဏ် ပေးခံရလိုက် စသည်ဖြင့် တောက်လျှောက်ဖြစ်နေခဲ့သည်။ ၁၉၆၆ ဒီဇင်ဘာလ (၃၁) ရက်နေ့တွင် လွတ်ငြိမ်းချမ်းသာခွင့် ပေးခံရလျက် လွတ်မြောက်လာချိန်မှစ၍ နောက်ထပ် အကျဉ်းချခြင်း မခံရတော့ပေ။ ထို့နောက်တွင်လည်း ကွန်မြူနစ်အုပ်ချုပ်မှုအား ဆန့်ကျင်သူအဖြစ် ဘဲလ်ဂရိတ်မြို့တွင် အခြေစိုက်လျက် တောက်လျှောက် ရပ်တည်ခဲ့ပြီး ၁၉၉၅-ခုနှစ်တွင် ကွယ်လွန်သည်။

“Withering away” of the State (နိုင်ငံတော် ညိုးနွမ်းသွေ့ခြောက် ပပျောက်သွားခြင်း)
● ကွန်မြူနစ်စနစ်၏ ဖခင်ကြီး ကားလ်မာ့ခ်စ်၏ အလိုအရ – ပစ္စည်းမဲ့လူတန်းစားက တော်လှန်လျက် နိုင်ငံတော်၏ အာဏာကို သိမ်းယူလျက် ရန်သူဟု သတ်မှတ်သော ဓနရှင် ဘူဂျွာဇီးလူတန်းစားအား ရှင်းလင်းမည်၊ ထိုနောက် ပြည်သူများအားလုံး သာတူညီမျှခံစားပိုင်ခွင့်ရှိကြသော လူတန်းစားကင်းမဲ့သော လောကနိဗ္ဗာန်ကြီးရှိရာသို့ တရွေ့ရွေ့ ချီတက်ကြမည်၊ ထိုကဲ့သို့ ချီတက်နေရင်း လူကိုလူချင်း အုပ်ချုပ်သော “နိုင်ငံတော်” ဟူသော အခြင်းအရာသည် “တဖြည်းဖြည်း ညိုးနွမ်းသွေ့ခြောက်” (withers away) သွားလိမ့်မည် – ဟု ၎င်းက ဆိုပေသည်။ မာ့ခ်စ်ဒါဒ၏ ထိုအယူအဆကို “Withering away” of the State (နိုင်ငံတော် ညိုးနွမ်းသွေ့ခြောက် ပပျောက်သွားခြင်း) ဟု ရည်ညွှန်းကြသည်။ ထိုသို့ဖြစ်လာမည့်အစား လက်တွေ့တွင်ကား ကွန်မြူနစ်နိုင်ငံများတွင် ယခင်အုပ်ချုပ်လွှမ်းမိုးသူများနေရာ၌ အခွင့်ထူးခံ အုပ်ချုပ်သူလူတန်းစားသစ် တစ်ရပ် ပေါ်ပေါက်လာသည် ဟု ဂျီးလာ့စ်က ဆိုသည်။ ယင်းအချက်သည် ဂျီးလာ့စ်ရေးသားသော “လူတန်းစားသစ်” စာအုပ်၏ အဓိက သတင်းစကား ဖြစ်လေသည်။

“လူတန်းစားသစ်”
● ၁၉၅၇-ခုနှစ် ထောင်ထဲကို မ၀င်ရသေးမီ အမေရိကန်ထုတ်ဝေသူထံသို့ ပေးပို့ထားနိုင်လိုက်သော “The New Class: An Analysis of the Communist System” (လူတန်းစားသစ်: ကွန်မြူနစ်စနစ်အား သုံးသပ်ချက်တစ်စောင်) စာအုပ်ကို ထုတ်ဝေသည်။ ထိုစာအုပ်ထွက်လာသည်ကို အကြောင်းပြုလျက် နောက်ထပ် ပြစ်ဒဏ် (၇) နှစ် ထပ်တိုးချမှတ်ခံရသည်။ ထိုစာအုပ်ပါ သဘောတရားအချို့ထဲမှ အစိတ်အပိုင်း အနည်းငယ်မျှကို အောက်တွင် အကျဉ်းမျှတင်ပြပါသည်။

● (ဆိုဗီယက်ယူနီယံ နှင့် အရှေ့ဥရောပတို့ တွင် ဖြစ်ပွားခဲ့သော) ကွန်မြူနစ်တော်လှန်ရေးတို့သည် “သွေးစုပ်သူ ‘ပိုင်ရှင်’ လူတန်းစားအသစ်” တစ်ရပ်အား ဖြစ်ထွန်းလာစေခဲ့သည်၊ ကွန်မြူနစ်စနစ်တရပ်လုံး၏ လည်ပတ်နေမှုသည် ထိုလူတန်းစားအသစ်၏ အကျိုးစီးပွားကို အဓွန့်ရှည်တည်တံ့နိုင်စေရန် လုပ်ဆောင်နေကြခြင်းဖြစ်သည်။ ဤအချက်မှာ “လူတန်းစားသစ်” စာအုပ်၏ အဓိကသတင်းစကား ဖြစ်သည်။

● စက်မှုလူ့အဖွဲ့အစည်း တည်ဆောက်ခြင်း (industrialization) ဆိုသည့် အချက်တစ်ချက်မှ လွဲ၍ ကွန်မြူနစ်စနစ်က ရယူလှမ်းဆွတ်မည် ဆိုသည့် စံပန်းတိုင်များကို ဘာတစ်ခုမှ ရယူနိုင်လိမ့်မည် မဟုတ်ပေ။ ဤကွန်မြူနစ် တော်လှန်ရေးများလောက် ကတိတွေ အများကြီးပေးပြီး အကျိုးအားဖြင့် အနည်းဆုံးသာ ရယူနိုင်ကြသည့် တော်လှန်မျိုး မရှိဖူးပေ။

● (ဤကွန်မြူနစ် လူ့အဖွဲ့အစည်းများတွင်) ပိုင်ဆိုင်မှုကို လူ့အဖွဲ့အစည်းကပိုင်သည် နိုင်ငံကပိုင်သည် ဟု ဥပဒေအကြောင်းအရ ယူဆသော်လည်း အမှန်တကယ်အားဖြင့်မူ အုပ်စုတစ်စုတည်းကသာလျှင် ၎င်းတို့၏ အကျိုးစီးပွားအတွက် ကိုင်တွယ် စီမံခန့်ခွဲ နေကြခြင်းဖြစ်လေသည်။

● (ဤကွန်မြူနစ် လူ့အဖွဲ့အစည်းများတွင်) အာဏာတို့ အစိုးရတို့ ဆိုသော စကားလုံးများကို အဓိပ္ပါယ်ဖွင့်ဆိုမည် ဆိုပါက “နိုင်ငံတွင် ရှိသမျှ ပစ္စည်းဥစ္စာများ အားလုံးလိုလိုအား သုံးစွဲခြင်း၊ ခံစားခြင်း၊ စိတ်ကြိုက်နေရာချထားခြင်း” နှင့် အဓိပ္ပါယ်ထပ်တူကျပေသည်။ အာဏာရှိသူ အစိုးရဖြစ်သူက တစ်တိုင်းပြည်လုံးကို စိတ်ကြိုက်လိုသလို မှောက်နိုင်လှန်နိုင်သည် ဟု ဆိုလိုသည်။

● ကွန်မြူနစ်များက ဖြစ်ချင်သည်ဖြစ်စေ မဖြစ်ချင်သည်ဖြစ်စေ စနစ်အရ ဖြစ်နေသည်မှာ – ကွန်မြူနစ်များသည် တိုင်းပြည်၏ ပိုင်ရှင်များ (owners) နှင့် အာဏာရှင်များ (despots) တစ်ပြိုင်တည်းတွင် ဖြစ်နေပေသည်။ ထို့ကြောင့် ကွန်မြူနစ်စနစ်လောက် အခြားမည်သည့်စနစ်ကမျှ ဤမျှ နက်ရှိုင်းလျက် နေရာအနှံ့ သက်ရောက်သော မကျေနပ်မှုများကို ဖြစ်စေခဲ့ခြင်းမရှိပေ။ ထို့ကြောင့် ကွန်မြူနစ်စနစ်တို့တွင် ပြည်သူများနှင့် အုပ်ချုပ်သူများအကြား မီးခဲပြာဖုံး မမြင်ရသည့် ပြည်တွင်းစစ်မျိုးပမာ အခြေအနေတစ်ရပ်သည်ကား အစဉ်အမြဲ ရှိနေလျက်ရှိပေသည်။

● လူတန်းစားသစ်၏ အလယ်အနှစ်သားတွင် ပါတီရှိပြီး အခွင့်အရေးရသည့် အခြားသူအချို့ကလည်း ပါတီကို ၀န်းရံအားဖြည့်လျက် ရှိသည်။ အချိန်နှင့်အမျှ ကွန်မြူနစ်ပါတီသည် အခွင့်ထူးခံ အိုလီဂါခီ (Oligarchy) အဖြစ်သို့ တဖြည်းဖြည်း ပြောင်းလဲလာသည်။ ပါတီ၏ အဆင့်အသီးသီးကနေ လူတန်းစားသစ်ဖြစ်ချင်သူများကို ဆွဲယူသိမ်းသွင်းပြီး အခြားတစ်ဖက်တွင် စံတန်ဖိုးများကို ခိုင်ခိုင်မာတန်ဖိုးထားသူများကို ဖိနှိပ်ဖယ်ရှားခြင်းသည် အလိုအလျောက် နှင့် တဖြည်းဖြည်း ဖြစ်လာသည်။ ဤနည်းအားဖြင့် လူတန်းစားသစ်သည် တဖြည်းဖြည်း အင်အားကြီးလာပြီး ပါတီသည် တဖြည်းဖြည်း အင်အားနည်းလာသည်။ ဤအဖြစ်မျိုးသည်ကား အာဏာရ မည်သည့် ကွန်မြူနစ်ပါတီမဆို မလွဲမသွေ ကြုံတွေ့ရမည့် ဖြစ်စဉ်ပေတည်း။

● တော်လှန်ရေး၏ အစပိုင်းနှင့် တော်လှန်ရေးအတောအတွင်းကာလများတွင် ကွန်မြူနစ်များအဖြစ် အနစ်နာခံ စွန့်လွှတ်ကြသည့် သူရဲကောင်းအနည်းငယ်မျှကို ကမ္ဘာကြီးက မြင်ဖူးခဲ့ပြီးလေပြီ။ အာဏာရလာပြီးသည့်အခါ အဓိပ္ပါယ်မဲ့ ဖော်မြူလာမူဝါဒများကို မိုက်မိုက်မဲမဲ ကာကွယ်ပြောဆိုသော အနှစ်သာရမဲ့ လူညစ်ထေးများအား ကမ္ဘာကြီးက မြင်တွေ့ဖူးပုံမရသေးပေ။ ထိုသူတို့သည် အုပ်ချုပ်သူလူတန်းစားထဲတွင် ၎င်းတို့ရထားသော နေရာတစ်နေရာစာမျှကို ဆက်လက်ထိန်းသိမ်းရန်အလို့ငှာ မည့်သည့်အရာကို မဆိုစွန့်လွှတ်ရန် (လိုအပ်ပါက သားကောင် ချနင်းရန်) ၀န်မလေးကြပေ။

● “လူတန်းစားသစ်” သည်ကား ကမ္ဘာ့သမိုင်းက မှတ်တမ်းတင်ဖူးသမျှ မည်သည့်လူတန်းစားထက်မဆို ပို၍ အဆင့်မြင့် ကျနစွာ ဖွဲ့စည်းတည်ဆောက်မှုပြုထားသည့်အပြင် လူတန်းစားသိစိတ်အရှိဆုံး လူတန်းစား ပင်ဖြစ်ပေသည်။ The new class is “more highly organized and more highly class-conscious than any class in the recorded history.”

သူ၏ ဇာတိမြေ
● ဂျီးလတ်စ် ၏ ဘ၀သက်တာတွင် မွန်တီနီဂရင်စာပေများ နှင့် မွန်တီနီဂရိုး သမိုင်းမှတ်တမ်းများစွာကိုလည်း ပြုစုခဲ့သေးရာ – မွန်တီနီဂရင်အား ဆားဘီးယားမဟုတ်သော သီးခြားလူမျိုးတစ်မျိုးအဖြစ် ပုံဖော်ပေးခဲ့သူ အဖြစ် ဆားဘီးယားအမျိုးသားရေးဝါဒီများက ဂျီးလတ်စ်အား စွပ်စွဲကြလေသည်။ ၁၉၄၅ -ခုနှစ်၀န်းကျင်က အင်တာဗျူးတစ်ခုတွင် ဂျီးလတ်စ်က မိမိကိုယ်မိမိ ဆားဘီးယားနွယ်ဖွား မွန်တီနီဂရိုးနယ်သား အဖြစ် ဖြေကြားသေးခဲ့သော်လည်း နောက်ပိုင်းတွင် မွန်တီနီဂရင်အား သီးခြားလူမျိုး တဖြည်းဖြည်း ပုံဖော်မှု ဖြစ်ထွန်းလာခဲ့ ပုံရလေသည်။ မွန်တီနီဂရင်စာပေများမှာ ၁၉၉၀ ၀န်းကျင်လောက်မှ စတင် သီးခြားပုံဖော်နိုင်ခြင်းဖြစ်သည် ဟု ဆိုကြသည်။
● မွန်တီနီဂရင်တို့မှာ လူမျိုးချင်း ယဉ်ကျေးမှုချင်း ဆားဘီးယားတို့နှင့် အထိုက်အလျောက် နီးစပ်ကြသည်။ ယူဂိုဆလားဗီးယား ပြည်ထောင်စုပြိုကွဲပြီးသောအခါ ဆားဘီးယားနှင့် မွန်တီနီဂရိုး နှစ်ခုပေါင်း ယူဂိုဆလပ်ပြည်ထောင်စုထဲတွင် ကျန်ရစ်သည်။ ၁၉၉၁-၁၉၉၅ ဘော့စနီးယားစစ်ပွဲ နှင့် ခရိုအေးရှားစစ်ပွဲတို့တွင် မွန်တီနီဂရင် ရဲနှင့် စစ်ဘက်တို့သည် ဆားဘီးယားတို့ဘက်မှ ၀င်တိုက်ခဲ့သေးသည်။ ၂၀၀၃-ခုနှစ်မှာ “ဆားဘီးယားနှင့် မွန်တီနီဂရိုး” ဟူ၍ နှစ်နယ်ပေါင်း တစ်နိုင်ငံ ပုံစံသစ်ဖြင့် ထူထောင်ကြသည်။ ၂၀၀၆-ခုနှစ်တွင် ဆန္ဒခံယူပွဲပြုလုပ်ကာ လူဦးရေ ခြောက်သိန်း၀န်းကျင်ရှိသည့် မွန်တီနီဂရိုးအား သီးခြားနိုင်ငံအဖြစ် ငြိမ်းချမ်းစွာ ခွဲထုတ်လိုက်သည်။ ယခုအခါ မွန်တီနီဂရိုးသည် ကမ္ဘာ့ကုလသမဂ္ဂအဖွဲ့၀င် နှင့် နေတိုး စစ်ရေးမဟာမိတ် အဖွဲ့၀င် နိုင်ငံတစ်နိုင်ငံ ဖြစ်သည်။

KZO
(၂၆-၀၉-၂၀၂၁)

[လူငယ်များအတွက် နိုင်ငံရေးမှတ်စုတိုများ (၂၄)]


Tag: လူငယ်များအတွက် နိုင်ငံရေးမှတ်စုတိုများ


Arakan-related Books and Documents / ရခိုင်​​ရေးရာ စာအုပ်​စာတမ်းများ


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s