“လိုအပ်ချက်အရ” ဟု အကြောင်းပြတတ်သည့် လက်တွေ့နိုင်ငံရေးဝါဒ (Realpolitik)

“လိုအပ်ချက်အရ” ဟု အကြောင်းပြတတ်သည့် လက်တွေ့နိုင်ငံရေးဝါဒ (Realpolitik)

အောဂုစ် လု့ဒိခ်ျ ဗွန် ရိုးဟာ
● အောဂုစ် လု့ဒိခ်ျ ဗွန် ရိုးဟာ (August Ludwig von Rochau) က ၁၈၅၃-ခုနှစ်တွင် “Realpolitik ၏ အခြေခံအုတ်မြစ်များ” (The Foundations of Realpolitik) စာအုပ်ကို ဂျာမန်ဘာသာဖြင့် ရေးသားထုတ်ဝေခဲ့သော အချိန်ကစ၍ Realpolitik သည် နိုင်ငံရေးဝေါဟာရ စကားလုံးတစ်လုံးအဖြစ် စတင်ပေါ်ထွန်းလာသည်။ ဂျာမနီပြည်တွင်းနိုင်ငံရေးအား စိတ်ထဲတွင် အခြေခံထား၍ ရည်မှန်းရေးသားခဲ့သော ထိုစာအုပ်တွင် ဖော်ပြထားသည့် ရိုးဟာ ၏ အဓိက တင်ပြချက်များမှာ –
◊ အင်အားကြီးသူများဥပဒေသ (the law of the strong) သည် နိုင်ငံရေးတွင် အဓိက အဆုံးအဖြတ်ပေးသော အခြင်းအရာဖြစ်သည်၊
◊ အထိရောက်ဆုံး အစိုးရပုံစံ ဆိုသည်မှာ အင်အားကြီးသော လူမှုအင်အားစုများအား နိုင်ငံတော် (the state) ထဲတွင် တစ်သားတည်းဖြစ်အောင် ဆွဲသွင်းလုပ်ဆောင်နိုင်သော အစိုးရမျိုးဖြစ်သည်၊
◊ အတွေးအခေါ် အယူအဆများ က လူ့အဖွဲ့အစည်းအား မည်သို့မည်ပုံ သြဇာလွှမ်းမိုးမှုရှိသည်ဆိုသည့်အပေါ် မူတည်လျက် ယင်းသက်ဆိုင်ရာ အတွေးအခေါ် အယူအဆများသည် အရေးကြီးမှု ရှိသည်၊
◊ အများပြည်သူ၏ ထင်မြင်ယူဆချက် ၊တစ်နည်း၊ Zeitgeist (ခေတ်၏ ဝိညာဉ်) သည် တိုင်းပြည်တစ်ခု၏ လားရာလမ်းကြောင်းကို သတ်မှတ်ကြရာ၌ အသက်တမျှ အရေးကြီးသည် – ဆိုသည့် အချက်တို့ ဖြစ်ကြသည်။

● မူလလက်ဟောင်း ရိုးဟာ ၏ လက်တွေ့နိုင်ငံရေးဝါဒ (Realpolitik) တွင် ဆင်ခြင်သုံးသပ်မှု သဘောတစ်ရပ် ပါရှိသည်။ မည်သို့ဆင်ခြင် သုံးသပ်သနည်း ဆိုသော်မူကား – ရေရှည်ရည်မှန်းချက်များသို့ မရောက်နိုင်သေးခင်မှာ လက်တွေ့နိုင်ငံရေး မြေပြင်အခြေအနေ (တစ်နည်း လက်တွေ့ပေးထားချက်များ) ကို စဉ်းစားထည့်သွင်းခြင်း ဖြစ်လေသည်။ ရိုးဟာ၏ သဘောအရ – မြင့်မားသော ရည်မှန်းချက်များကို ရည်မှန်းလုပ်ဆောင်ခြင်းတို့အား ရေတိုရေမှန်းချက်များကို ရည်မှန်းလုပ်ဆောင်ခြင်းများနှင့် ဒွန်တွဲ လုပ်ဆောင်သွားရန် ဖြစ်လေသည်။ မျက်စိတစ်ဖက်က ရေရှည်ရေမှန်းချက်ကို လှမ်းကြည့်ထားပြီး နောက်တစ်ဘက်က ရေတိုရည်မှန်းချက်ကို မျက်စပစ်ထားနိုင်သည် ဟု ဆိုလိုသည်။

● ရိုးဟာ ပြောသော Realpolitik ဟူသည်ကား – အမှန်တကယ်ရှိနေသော အခင်းအကျင်း နောက်ခံ (context) တို့အား ထည့်သွင်းစဉ်းစားလျက် လက်ရှိနိုင်ငံရေးအခြေအနေကို အရှိအရှိအတိုင်း သိမြင်နိုင်အောင် အားထုတ်ကြည့်မြင် ဆန်းစစ်ခြင်း ကို ဆိုလိုပေသည်။ မိမိကိုယ်ကိုလည်း မညှာမတာ ဆန်းစစ်လျက် တချိန်တည်းမှာပင် –
◊ လက်ရှိအခြေအနေ၏ ကန့်သတ်မှုများအပေါ်မူတည်လျက် နိုင်ငံရေးဖြစ်တန်ခြေ မည်မျှအထိမျှော်လင့် နိုင်သနည်း ဟု ဆန်းစစ်လျက် –
◊ အတွေးအခေါ်အယူအဆများ၏ အင်အား နှင့် အများပြည်သူထင်မြင်ချက်တို့၏ အင်အားကို နားလည် သဘောပေါက်လျက် –
◊ ဘောဂဗေဒ နှင့် လူ့အဖွဲ့အစည်းတို့အား နိုင်ငံရေးအာဏာနှင့် စိတ်ကူးစိတ်သန်းများဖြင့် ချိတ်ဆက် ဆောင်ရွက်နိုင်ရန် သုံးသပ်ဆန်းစစ်ခြင်း ဖြစ်သည် ဟု ဆိုလိုချက်ကို နားလည်ရပေသည်။

ရေးအားပေါ်လိတိခ် (Realpolitik) ၏ အဓိပ္ပါယ်ရွေ့လျားပြောင်းလဲခြင်း
● ရိုးဟာက ရေးအားပေါ်လိတိခ် (Realpolitik) ဆိုသည့်စကားလုံးကို ဂျာမန်ကွန်ဖက်ဒရေးရှန်း တွင်းရေးရာ (ပြည်တွင်း ရေးရာ) နိုင်ငံရေးအား ချင့်တွက်ဆင်ခြင်သည့်နေရာတွင် သုံးစွဲခဲ့သော်လည်း – နောင်နှစ်များမကြာမီ ၁၈၆၀ နှင့် ၁၈၇၀ ပြည့်လွန်နှစ်များတွင် ဥရောပအလယ်ပိုင်းရှိ ဂျာမန်စကားပြောနယ် (၃၉) နယ်အနက် သြစကြီးယားကို ချန်လှပ်လျက် ဂျာမန်အင်ပါယာ စုစည်းတည်ထောင်ခြင်းအား ပရပ်ရှားနယ် နန်းရင်း၀န် ဘစ္စမတ်၏ ဦးဆောင်မှုဖြင့် အောင်မြင်စွာဆောင်ရွက်ရာတွင် သံခင်းတမန်ခင်း နှင့် စစ်ရေးစစ်ရာတို့၌ ကျင့်၀တ်အလေးပေးခြင်းမရှိ လက်တွေ့အခြေအနေအသာရရန် အကွက်ရွေ့ကစားခြင်းများကို ရေးအားပေါ်လိတိခ် အဖြစ် စတင်ရည်ညွှန်းသုံးစွဲခဲ့ကြရာမှ ယင်းစကားလုံး၏ အဓိပ္ပါယ်မှာ စတင်ပြောင်းလဲလာခဲ့သည်။ နိုင်ငံတကာဆက်ဆံရေးတွင် မာ့ခီယာဗယ်လီဆန်ဆန် ရလဒ်ပဓါနပြုလျက် ရည်မှန်းချက်ပေါက်မြောက်အောင် ဆောင်ရွက်ခြင်းများကို ရေးအားပေါ်လိတိခ် အဖြစ်စတင်ခေါ်ဝေါ် သုံးစွဲလာကြသည်။

● အနီးဆုံးခေတ်တွင် ရေးအားပေါ်လိတိခ် (Realpolitik) နှင့် ယှဉ်တွဲသိကြသော ပုဂ္ဂိုလ်များအနက် ထင်ရှားသူတစ်ဦးမှာ – အမေရိကန်နိုင်ငံခြားရေး၀န်ကြီးဟောင်း ဟင်နရီကစ်ဆင်းဂျာ ဖြစ်လေသည်။ သူ့လက်ထက်ထင်ရှားသော လုပ်ရပ်တစ်ခုကို ပြရမည်ဆိုလျှင် – တစ်ဘက်က လူ့အခွင့်အရေး လူ့အခွင့်အရေး ဟု တွင်တွင်ကျယ်ကျယ် အော်နေခဲ့သော်လည်း ချီလီနိုင်ငံအရေးတွင် အာဏာသိမ်း စစ်ခေါင်းဆောင် ပီနိုချေး နှင့်အတူ အမေရိကန်က ရပ်တည်ခဲ့သည့် လုပ်ရပ် ဖြစ်လေသည်။ ယခုလည်း လူ့အခွင့်အရေး ဒီမိုကရေစီအရေး မည်မျှပင် ပြောနေစေကာမူ အရှေ့အလယ်ပိုင်းတွင် ဆော်ဒီအာရေဗီးယားကဲ့သို့ နိုင်ငံမျိုးအား မဟာမိတ်အဖြစ် အမေရိကန်က ပေါင်းဖက်နေရခြင်းမှာ လုံခြုံရေး ‘လိုအပ်ချက်အရ’ ဖြစ်သည် ဟု ကစ်ဆင်ဂျာက ဆိုလေသည်။ ယနေ့နာမည်ကြီးနေသော “လိုအပ်ချက်အရ” ဟူသည့်စကားလုံးမှာ ရေးအားပေါ်လိတိခ်သမား တို့ များစွာ သုံးဖူးသော စကားလုံး ဖြစ်ပေသည်။

ရေးအားပေါ်လိတိခ် (Realpolitik) ၏ ယနေ့ခေတ် အဓိပ္ပါယ်
● ယနေ့ခေတ် ရေးအားပေါ်လိတိခ် ၏ အဓိပ္ပါယ်ကို Google က ဤကဲ့သို့ သတ်မှတ်ဖွင့်ဆိုသည်။ “A system of politics or principles based on practical rather than moral or ideological considerations.” သဘောတရားရေးရာ ထည့်သွင်းစဉ်းစားမှုများ သို့မဟုတ် ကျင့်၀တ်ပိုင်းဆိုင်ရာ စဉ်းစားမှုများထက် လက်တွေ့ရေးရာစဉ်းစားမှုကို အခြေခံသော မူများ သို့မဟုတ် နိုင်ငံရေးစနစ် တစ်ခု ဟု Google က ယနေ့ခေတ်တွင် ဖွင့်ဆိုသည်ကို တွေ့ရသည်။ pragmatism လက်တွေ့အကျိုးကြည့်ဝါဒ ဆိုသည့်စကားလုံးနှင့် ထပ်တူနီးပါး ယနေ့ခေတ်တွင် ယူဆသုံးစွဲကြသည်ကို တွေ့ရသည်။ တကယ်ဒန္တုလည်း national interests နိုင်ငံ၏ အကျိုးစီးပွားကို ဦးထိပ်ထားရပါသည် ဆိုသည့်စကားမှာ နိုင်ငံရေးသမားတော်တော်များများအဖို့ မလွဲမရှောင်သာသော စကားဖြစ်လေသည်။

● မည်သို့ပင်ဆိုစေကာမူ မူလလက်ဟောင်း ရေးအားပေါ်လိတိခ် (Realpolitik) စကားလုံးကို တီထွင်သုံးစွဲခဲ့သော ရိုးဟာ၏ The Foundations of Realpolitik စာအုပ်ပါ တင်ပြချက်များသည်ကား နိုင်ငံရေးလေ့လာသူများအတွက် အနည်းနှင့်အများ အကျိုးဖြစ်စေသည်သာ ဖြစ်လေသည်။

“The Foundations of Realpolitik” စာအုပ်
● အင်အားသည်ကား အမြဲတမ်း မှန်သည် မဟုတ် (အမှန်ဘက်က မဟုတ်)။ ရိုးဟာက ဆိုသည်မှာ ‘လစ်ဘရယ်များ၏ အမှားတစ်ရပ်သည်ကား – မှန်ကန်မှုမရှိ ဟု ပြသနိုင်သည်နှင့် တပြိုင်နက် the law of the strong အင်အားကြီးသူသာ လွှမ်မိုးမည် ဆိုသည့် အခြေအနေသည် အုံဖွဆိုသလို အငွေ့ပျံ ပျောက်ကွယ်သွားမည် ဟု ထင်မှတ်မိကြခြင်းပေတည်း’ ဟု ဆို၏။ ‘ငါတို့က ဓမ္မ၊ နင်တို့က အဓမ္မ’ ဆိုသည်နှင့် အဓမ္မဘက်မှ ရှုံးသွားမည် ဟု မျှော်လင့်ထားခြင်းမျိုးမှာ အလိုလို မဖြစ်နိုင် ဆိုလိုသည်။

● ကောက်နှုတ်ချက်။ “ဂျက်ရကိုမြို့နံရံများအား ဖြိုချနိုင်ဖို့အရေးတွင် – ကျယ်လောင်လှစွာသော တံပိုးခရာ ထက် သာမန်ပေါက်ချွန်းငယ် က ပိုမို အသုံးကျသည်ကို ရေးအားပေါ်လိတိခ်သမား က ကောင်းစွာ သဘောပေါက်ပေသည်။” “To bring down the walls of Jericho, the Realpolitiker knows the simple pickaxe is more useful than the mightiest trumpet.”

KZO
(၂၃-၀၉-၂၀၂၁)

[လူငယ်အတွက် နိုင်ငံရေးမှတ်စုတိုများ(၂၃)]


Tag: လူငယ်များအတွက် နိုင်ငံရေးမှတ်စုတိုများ


Arakan-related Books and Documents / ရခိုင်​​ရေးရာ စာအုပ်​စာတမ်းများ


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s