အစ္စရေးမှတ်စု(၂)။ “အရေးဆိုသမားများအတွက် လက်စွဲများ ရေးသားသူ Frank Luntz”

အစ္စရေးမှတ်စု(၂)။ “အရေးဆိုသမားများအတွက် လက်စွဲများ ရေးသားသူ Frank Luntz”

● တစ်နေ့က အမေရိကန်မြို့တစ်မြို့တွင် ကိုယ်၀န်ချက်ချခွင့် တရား၀င်ဖြစ်ရေးအတွက် ဆန္ဒပြနေကြသည့် သတင်းဗီဒီယိုတစ်ခုကို ကြည့်ရှုလိုက်ရသည်။ သူတို့ တောင်းဆိုနေသည့်အရေးကို ကိုယ်၀န်ဖျက်ချခွင့်လိုလားခြင်း (pro-abortion) ဟု ဆန္ဒပြသူများက မသုံးဘဲ ရွေးချယ်ခွင့်လိုလားခြင်း (pro-choice) ဟု သုံးစွဲကြသည်။ pro-abortion ဟု သုံးစွဲပြောဆိုပါက ဆန့်ကျင်ဘက်သက်ရောက်မှုများ ပိုမိုဖြစ်လာနိုင်ခြေ ရှိခြင်း ရင့်သီးခြင်း တို့ကြောင့် မိမိတို့အရေးဆိုမှု အောင်မြင်စေရန်အလို့ငှာ အကောင်းဖက် သက်ရောက်နိုင်ခြေများသော pro-choice ဟူသည့် စကားလုံးအား စနစ်တကျရွေးချယ် သုံးစွဲကြခြင်း ဖြစ်လေသည်။

● ထိုနည်းတူစွာ အကြောင်းအရာတစ်ရပ်ကို ဆိုးကျိုးသက်ရောက်မှုများစေရန်အလို့ငှာဖြစ်စေ လူအများငြင်းပယ်မှု ဖြစ်လာစေရန်အလို့ငှာ ဖြစ်စေ တမင်တကာ ပုံရိပ်ဆိုးစေသည့် စကားလုံးများ သုံးစွဲရသည်လည်း ရှိပေသည်။ ဥပမာအားဖြင့် – အမွေဆက်ခံရာတွင် အစိုးရကကောက်သောအခွန် (Interitance/Estate tax) ကို ဆန့်ကျင်အရေးဆိုလိုသူများအနေဖြင့် မူရင်းစကားလုံးအတိုင်း ပြောဆိုသုံးစွဲခြင်းမပြုဘဲ Death tax (မသာခွန်) ဟု ရည်ညွှန်းပြောဆိုသုံးစွဲခြင်းအားဖြင့် – လူတွေက မိသားစု၀င်တွေ သေလို့ ငိုငိုရယ်ရယ်ဖြစ်နေရတဲ့အထဲ အစိုးရက အခွန်လာကောက်နေတယ် ဟူသော အဓိပ္ပါယ် သက်ရောက်မှုလည်း တပါတည်းပါသွားနိုင်ပေသည်။ ယခင်က Global Warming (ကမ္ဘာကြီး ပူနွေးလာခြင်း) ဟူသော စကားလုံးအား အသုံးများကြသော်လည်း ထိုစကားလုံးထက် ပိုမိုသက်ရောက်မှုကောင်းသော ပိုမိုဆွဲဆောင်နိုင်စွမ်းရှိသော Climate Change (ရာသီပုံစံ ပြောင်းလဲလာခြင်း) ဟူသော စကားလုံးအား သုံးစွဲသင့်ကြောင်း ကျွမ်းကျင်သူတစ်ယောက်က စတင်အကြံပြုခဲ့ပြီးနောက်ပိုင်း ထိုစကားလုံးမှာ အသုံးတွင်ကျယ်လာလေသည်။ ထိုစကားလုံး နှစ်လုံးစလုံးက ရည်ညွှန်းပြောလိုသော အကြောင်းအရာနယ်ပယ်မှာ အတူတူပင် ဖြစ်လေသည်။ အဆိုပါ Death tax ဟူသော စကားလုံးနှင့် Climate change တည်းဟူသော စကားလုံးများ၏ ဖခင်မှာ Dr Frank Luntz ဖြစ်ပေသည်။ ၎င်းမှာ လော်ဘီလုပ်ခြင်း၊ advocacy နိုင်ငံရေးအရေးဆိုခြင်း နှင့် ရွေးကောက်ပွဲအောင်နိုင်ရေး ဆိုင်ရာ ကျွမ်းကျင်သူ အကြံပေးတစ်ဦး ဖြစ်ပေသည်။

● အမေရိကန် ရီပတ်ဘလီကန်ပါတီအတွက် ၎င်း ရေးသားသော လက်စွဲ (playbook) တစ်အုပ်တွင်လည်း ရီပတ်ဘလီကန်မူဝါဒများကို အောင်မြင်စွာတင်ပြဆွဲဆောင် နိုင်စေရေးအတွက် – စကားလုံးအချို့ကို သုံးရိုးသုံးစဉ်မသုံးဘဲ ပြောင်းလဲ သုံးစွဲသင့်ကြောင်း Dr Frank Luntz   အကြံပြုထားသည်ကို တွေ့ရသည်။ ယင်းတို့ထဲမှ အချို့မှာ အောက်ပါတို့ ဖြစ်ကြသည်။
◊ A Global Economy/Globalization/Capitalism ဆိုသည့်စကားလုံးများအစား Free Market Economy (လွတ်လပ်သော စျေးကွက်စီးပွားရေးစနစ်) ဟု သုံးစွဲပါ။
◊ Undocumented Workers (အထောက်အထားမဲ့ အလုပ်သမားများ) ဆိုသည့်စကားလုံးအစား Illegal Aliens (တရားမ၀င် နိုင်ငံခြားသားများ) ဟု သုံးစွဲပါ။
◊ Foreign Trade (နိုင်ငံခြား ကုန်သွယ်မှု) ဆိုသည့်စကားလုံးအစား international trade (နိုင်ငံတကာ ကုန်သွယ်မှု) ဟု သုံးစွဲပါ။
◊ Drilling for oil (ရေနံ ရှာဖွေတွင်းတူးခြင်း) ဆိုသည့်စကားလုံးအစား exploring for energy  (စွမ်းအင် စူးစမ်းရှာဖွေခြင်း) ဟု သုံးစွဲပါ။

● ၂၀၀၉-ခုနှစ်တွင် Dr Frank Luntz သည် အစ္စရေးအရေးကို အရေးဆိုသူများ နိုင်ငံရေးသမားများအနေဖြင့် အစ္စရေး-ပါလက်စတိုင်းဆိုင်ရာ ကိစ္စအ၀၀တို့၌ အမေရိကန်လူထုအား မိမိဘက်သို့ပါအောင် မည်ကဲ့သို့ ဆွဲဆောင်ပြောဆိုသင့်သနည်း ဆိုသည်ကို စာမျက်နှာ တစ်ရာကျော်ရှိ လက်စွဲစာအုပ် (playbook) တစ်အုပ်ကို အစ္စရေးအစိုးရအတွက် ပြုစုပေးလေသည်။ ဖြန့်ချိရန် မဟုတ်သောစာအုပ်အဖြစ် ရည်ရွယ်ခဲ့သော်လည်း ပြင်ပသို့ရောက်လာသဖြင့် ရန်သူမိတ်ဆွေမဟူ အများသူငါတို့ ဖတ်ရှုခွင့်ရကြလေသည်။ ထိုလက်စွဲစာအုပ်အား ဖတ်ရှုကြည့်ပါက ကျွန်တော်တို့သည်ပင်လ ျှင်လည်း မိမိတို့မှာ လွဲချော်နေသော အပြောအဆို အမူအကျင့်များအား ချေချွတ်ပြင်ဆင်ရန် လိုအပ်သည် ဟု ဆင်ခြင်ဖွယ်ရာများ တွေ့ရလေသည်။

● ယင်းလက်စွဲ၏ အခန်း (၁) တွင် စည်းမျဉ်း (၂၅) ချက်ကို မိတ်ဆက်ပေးထားရာ ယင်းတို့ထဲမှ စိတ်၀င်စားဖွယ်ရာ စည်းမျဉ်းအချို့ကို အောက်တွင်ဖော်ပြလိုက်သည်။

◊ “သင်သည် ဂရုစိုက်စာနာမှုရှိသူဖြစ်ကြောင်း မသိသေးသရွေ့ persuables (ဆွဲဆောင် ရနိုင်ခြေရှိသူများ) အနေဖြင့် သင်ဘာသိသလဲ ဆိုသည်ကို ဂရုစိုက်လိမ့်မည် မဟုတ်။ ထို့ကြောင့် နှစ်ဘက်စလုံးအား စာနာမှုရှိကြောင်း ပြသပါ။” ဥပမာအားဖြင့် – “Israel is committed to a better future for everyone – Israelis and Palestinians alike.” အစ္စရေးများအတွက်ရော ပါလက်စတိုင်းများအတွက်ပါ အစ္စရေးနိုင်ငံသည် အားလုံးအတွက် ပိုမိုကောင်းမွန်သော အနာဂတ်သို့ အခိုင်အမာ ရည်မှန်း လုပ်ဆောင်လျက် ရှိပေသည်  . . . .  စသည်ဖြင့် စသည်ဖြင့် . . . .
◊ ပါလက်စတိုင်းလူထု နှင့် ဟားမတ်စ် အဖွဲ့တို့အား တပေါင်းတည်း ရောထွေးပစ်ခြင်းမပြုဘဲ ရှင်းလင်းပြတ်သားစွာ ခွဲခြားပြောကြားပါ။
◊  အပြစ်မဲ့ အမျိုးသမီးများ ကလေးသူငယ်များအား တမင်တကာ ပစ်မှတ်ထား သတ်ဖြတ်မှုများအတွက် တရားမျှတပါကြောင်း အကြောင်းပြနိုင်ခွင့် လုံး၀လုံး၀ (လုံး၀) မရှိစေရ။
◊ အစ္စရေးဘက်မှာ အပြစ်အနာအဆာများ အမှားအယွင်းများ လုံး၀မရှိကြောင်း ဟန်ဆောင်ခြင်း မပြုပါနှင့်။
◊ အရေးအသားအများစုမှာ အပြုသဘော ရေးသားရမည် ဖြစ်သော်ငြားလည်း -ပါလက်စတိုင်းတို့ဘက်တွင် အီရန်နောက်ခံ ဂျီဟတ်လှုပ်ရှားမှုပြုသော စစ်လိုလားမှုမှန်သမျှကို ရပ်တန်းက ရပ်ရမည် ဖြစ်ကြောင်း ခိုင်ခိုင်မာမာ ထပ်ကာတလဲလဲ ပြောနိုင်လေ အစ္စရေးအတွက် စာနာမှုပိုရနိုင်လေဖြစ်သည်။
◊ အစ္စရေးနိုင်ငံအနေဖြင့် ငြိမ်းချမ်းရေးကို လိုလားကြောင်း ထပ်ကာတလဲလဲ ပြောပါ။
◊ အကြမ်းဖက်ဝါဒ (တိုက်ခိုက်မှုများအား) ကာကွယ်ခြင်းအပါအ၀င် အမေရိကန် နှင့် အစ္စရေးတို့အကြား တူညီမှုရှိသည့်အချက်များကို ဆွဲထုတ်ပြောကြားပါ။
◊ ဘာသာရေးအကြောင်းကို မပြောပါနှင့်။

● အလေးပေး သုံးစွဲသင့်သော စကားလုံးများ/စကားစုများအား Dr Frank Luntz က တင်ပြထားရာ ယင်းတို့ထဲမှ အချို့အား ထပ်ဆင့်တင်ပြပါသည်။
◊ Accountability
◊ Building
◊ Children
◊ “Come to Jerusalem to work for peace”
◊ “Cooperation, collaboration, and compromise”
◊ “Deliberately firing rockets into civilian communities” (အရပ်သား အသိုက်အ၀န်းများထံသို့ တမင်တကာ ရည်စူးလျက် ဒုံးကျည်များ ပစ်ခတ်ခြင်း)
◊ “Economic Diplomacy” စီးပွားရေးရာ သံခင်းတမန်ခင်း ဟု သုံးစွဲခြင်းသည် sanction (စီးပွားရေးအရ အရေးယူမှု) ဆိုသည့် စကားလုံးထက် ပိုကောင်းသည် ဟု အကြံပြုသည်။
◊ “Living together, side by side
◊ “Militant Islam”
◊ “One step at a time, one day at a time”
◊ “Prevention” ကြိုတင်ကာကွယ်ခြင်း ဟု သုံးစွဲခြင်းသည် preemption (တင်ကြိုလက်ဦးမှု ယူခြင်း) ဆိုသည့် စကားလုံးထက် ပိုကောင်းသည် ဟု အကြံပြုသည်။
◊ “The RIGHT to”

KZO
(၁၉-၀၉-၂၀၂၁)

[လူငယ်များအတွက် နိုင်ငံရေးမှတ်စုတိုများ(၂၁)]


Tag: လူငယ်များအတွက် နိုင်ငံရေးမှတ်စုတိုများ


Arakan-related Books and Documents / ရခိုင်​​ရေးရာ စာအုပ်​စာတမ်းများ


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s